null

null
«Хвала на вышынях Богу, а на зямлі — супакой людзям добрай волі!» — гэтую песню пры нараджэнні Езуса спявалі анёлы пастушкам, якія сталі першымі сведкамі ўцелаўлення Божага Сына. Ў гэтыя дні Божага Нараджэння ва ўсіх касцёлах можна пачуць такі ж спеў радасці. Гэтая радасць ёсць з прычыны прысутнасці сярод нас Дзіцятка Езуса. Свет з Яго прыходам перастаў быць цемрай. Святло бэтлеемскай зоркі прыйшло да мільёнаў людзей на ўсёй зямлі. Тыя, хто шукаюць Святла, цяпер ведаюць, дзе можна Яго знайсці. Няма лепшага жыццёвага шляху, чым той, які вядзе да Бога.

Езус нарадзіўся ў беднасці і вучыць гэтым нас, што шчасце не залежыць толькі ад зямнога багацця. Прыйшоў на зямлю без пышных прывітанняў і паказвае нам, каб і мы былі людзьмі пакорнымі, больш увагі надавалі іншым. Бог зыйшоў да нас, каб мы маглі прыблізіцца да Яго і маглі ахвяраваць Яму нашую любоў.

Езус аб’яўляецца нам таксама і ў паўсядзённым жыцці. Але мы мусім быць вельмі ўважлівыя, каб умець адкрыць Хрыста ў простых і, на наш погляд, звычайных сiтуацыях. А адкрыўшы Езуса для сябе, трэба заўсёды старацца дапамагчы знайсці Яго і іншым.

Няхай жа з прыходам гэтага свята – з Божым Нараджэннем – свет стане больш спакойным, людзі – дабрэйшымі, няхай ваш уласны шлях да Хрыста будзе больш шчаслівым, а праўдзівая Божая Радасць няхай назаўсёды паселіцца ў вашых сэрцах!

Ксёндз Юры БЫКАЎ, пробашч парафіі Беззаганнага Зачацця Найсвяцейшай Панны Марыі ў Бабруйску

Святочныя Імшы у нашым касцёле:

24 снежня – а 22.00 гадзіне

25 снежня – а 9.00 і а 11.00 гадзінах