Велікоднае пасланне каталікам Бабруйска пробашча касцёла Безаганнага зачацця Найсвяцейшай Панны Марыі ксяндза Андрэя Таўрука.
Дарагія браты і сёстры ў Хрысце, паважаныя бабруйчане і ўсе людзі добрай волі!
Хрыстос Уваскрос! Гэтыя словы не проста як прывітанне, а як галоўная вестка ў жыцці чалавека.
Вялікдзень – гэта перамога святла над цемрай, жыцця над смерцю, любові над нянавісцю. У гэты дзень мы ўспамінаем, што Гасподзь, прайшоўшы праз пакуты і крыж, знішчыў сілу смерці. Ён паказаў нам, што няма такога смутку, які б не асвяціла Ягоная любоў.
Часта ў жыцці сустракаемся з цяжкасцямі, слязамі, стратамі. Здаецца, што вось яна – пятніца, і зямля дрыжыць ад болю. Але Вялікдзень нагадвае нам: пасля пятніцы заўсёды прыходзіць нядзеля. Не бойцеся цемры, бо Хрыстос ужо асвяціў яе святлом Свайго Уваскрасення.
Я хачу пажадаць вам, каб радасць гэтага дня заставалася з вамі не толькі на тыдзень, але на ўсё жыццё. Няхай у вашых душах пануе супакой, у дамах – дабрабыт, а ў сем’ях – згода.
Няхай Уваскрослы Хрыстос блаславіць усе вашы добрыя учынкі, асвяціць вашыя штодзённыя клопаты і напоўніць сэрцы светлай надзеяй. Прабачайце адзін аднаму крыўды, як і Хрыстос дараваў нам.
Віншую вас са святлом Хрыстовага Уваскрасення!
Няхай Божае благаславенне будзе з вамі сёння і заўсёды.
Хрыстос Уваскрос! Сапраўды Уваскрос!
Расклад святочных набажэнстваў і асвячэння страваў у касцёле
Вялікі чацвер
- 19:00 –св. Імша Вячэры Пана.
Вялікая пятніца
- 18:30 – Крыжовы шлях
- 19:00 – Літургія Вялікай пятніцы
Вялікая субота
- 10:00, 12:00 – асвячэнне страваў на велікодны стол
- 20:00 - св. Пасхальная Вігілія (пасля – асвячэнне страваў на велікодны стол)
Велікодная Нядзеля Уваскрасення Пана
- 7:00 Св. Імша з Рэзурэкцыйнай працэсіяй (пасля – асвячэнне страваў на велікодны стол)
Таксама на сайце:
У бабруйскім касцёле адзначылі Вербную-Пальмовую нядзелю: фотафакт.
